ايه هى أشهر الوظائف اللي موجودة في مجال البيانات
أنا حابب أشتغل في مجال البيانات أو الـ Data، إيه هى الوظائف اللي موجودة في المجال ده؟
باختصار، فيه ٥ وظائف مشهورة في مجالات البيانات:
مهندس البيانات أو الـ Data Engineer
1 - مهندس البيانات أو الـ Data Engineer : وده الشخص المسؤول عن بناء الـ Tables اللي بيستخدمها باقي الفريق لتحليل وعرض البيانات.
مطور ذكاء الأعمال أو الـ BI Developer
2 - مطور ذكاء الأعمال أو الـ BI Developer: وده الشخص اللي مطلوب منه يبني الـ Dashboards اللي بتوضح وبتحدد أداء الشركة من مختلف الجوانب.
محلل البيانات أو الـ Data Analyst
3 - محلل البيانات أو الـ Data Analyst: محلل البيانات دوره انه يجاوب على أسئلة من خلال البيانات ويحدد إزاي نحسن أداء الشركة.
عالم البيانات أو الـ Data Scientist
4 - عالم البيانات أو الـ Data Scientist: دوره انه يعمل نفس اللي بيعمله ال Data Analyst بالإضافة إلى بناء النماذج أو الـ Models اللي تساعد على توقع أداء الشركة.
مهندس تعلم الآلة أو الـ Machine Learning Engineer
5 - مهندس تعلم الآلة أو الـ Machine Learning Engineer: مع الاهتمام المتزايد بالـ Machine Learning شركات كتير بقت بتعين شخص مسئول بس انه يبني ال Machine learning algorithms ويعملها Optimization.
في فريق العمل على مشروع معين بنلاقى وظائف مختلفة وكل شخص مسئول عن دور معين وعنده مهارات مختلفة عن باقي أفراد الفريق. وبما إن المجال جديد إلى حد ما فبنلاقي وظائف جديدة بتزيد أو وظيفة واحدة بتتقسم لوظيفتين أو أكتر، وده نفس اللي حصل في مجال علوم الحاسب أو Computer Science يعني دلوقتي بنلاقي في المشروع الواحد أكثر من وظيفة Back-end، Front-end, UI/UX, Testing وفي بداية مجال computer science كل ده مكانش موجود.
خلونا الأول نقسم الوظائف المرتبطة بالبيانات لنوعين Back-end ، Front-end
أولا الـ Back-end:
ودي الناس اللي بيكون أساس شغلها البرمجة أو الـ Coding، يعني هنا الشخص مش مهتم بالأرقام ولا اللي بتمثله، وكل دوره Automation لبعض المهام اللي بتخدم على الـ Front-end. والوظايف المرتبطة بالبيانات اللي بتركز على الـ Back-end هى:
مهندس البيانات أو الـ Data Engineer
1 - مهندس البيانات أو الـ Data Engineer: والوظيفة ده ليها مسميات كتير مع بعض الاختلافات الطفيفة زي ( ETL Developer , Big Data Engineer) عامة دور ال Data Engineer انه ينقل الداتا من ال Source و يحطها في الـ storage، والـ storage غالبا بتبقى الـ Tables اللي بيستخدمها باقى الفريق عشان يحلل البيانات ويعرضها ويطلع باستنتاجات أو تنبؤات منها.
مهندس تعلم الآلة أو Machine Learning Engineer
2 - مهندس تعلم الآلة أو Machine Learning Engineer: وده الشخص اللي مطلوب منه يبني ويختار وينفذ خوازميات أو Algorithms التعلم الآلي. بمعنى انه بيختار الـ Algorithm ويبدأ يعمله Optimization بحيث أنه يحقق أفضل نتائج.
مطور ذكاء الأعمال أو الـ BI Developer
3 - مطور ذكاء الأعمال أو الـ BI Developer: وده الشخص المسئول انه يبني الـ Dashboards، والهدف منها إن الشركة تقدر تتابع الأرقام باستمرار. ال BI Developer دي وظيفة موجودة من سنين (من قبل الـ Data Scientist ) بكتير لكنها بتشترك معاها في حاجات زي أهمية الـ Data Visualization لإن الاتنين مطلوب منهم يعرضوا البيانات أو الـ Data لكن الفرق الأهم والأكبر إن ال BI Developer بيبني الـ Dashboard مرة واحدة وتبدأ هي يحصلها Update كل يوم على عكس ال Data Scientist اللي بيحاول يشرح المعاني والعلاقات والإرتباطات اللي في البيانات اللي بيعرضها مع تفسير الأسباب والنتائج والتوصيات.
عموما الوظائف المذكورة فوق بتحتاج خبرة في البرمجة تحديدا SQL و Python أو R، و ساعات كتير بيبقى الشخص مش مهتم بالأرقام لإنها بتتغير من وقت للتاني، لكن الأهم انه يبني الـ Query أو الـ Flow او الـ Algorithm المناسب.
ثانيا وظائف الـ Front End:
ودي وظائف ليها طبيعة تحليلية Analytical أكتر يعني بتحاول تحل مشكلة عن طريق تحليل البيانات، على عكس ال Back end اللي دوره انه يبني شيء نسبيا عام الهدف أو General purpose.فرق جوهرى آخر هو التعامل مع الـ stakeholders وهما الناس أصحاب المصلحة أو بمعنى أوضح الإدارة العليا في الـ Business (على سبيل المثال إدارة المبيعات أو التسويق) هنلاقي هنا ان وظايف ال front-end رايحين جايين عليهم ويشرحوا لهم اللي لقوه وطلعوا بيه من البيانات، على عكس وظائف الـ Back End.
ومن الوظايف دي:
محلل البيانات أو الـ Data Analyst
1 - محلل البيانات أو الـ Data Analyst: وه شخص مطلوب منه يجاوب على سؤال معين من البيانات وغالبا السؤال دا بيبقى من منظور الـ Business (ليه مبيعاتنا قلت الشهر ده؟ أو مين أحسن موظف مبيعات عندنا؟ ايه أفضل القطاعات أو المنتجات مبيعا؟ مخزون الشركة من منتج معين هيقدر يغطي احتياجات الشركة لقد ايه؟) والحقيقة الأسئلة دي ممكن تجاوبها لو عندك Dashboard قوية بتساعد الـ Businessانه يجاوب على أسئلته بنفسه، عشان كدا كتير من ال Data Analysts بيقضوا ساعات وقت انهم يبنوا Dashboards لو لقوا ان مفيش Dashboards قوية بتوضح كل حاجة.
وأخيرا الـ Data Scientist
3 - وأخيرا الـ Data Scientist : الاسم الاشهر في مجال البينات، و الوظيفة اللي بقالهاأكتر من خمس سنين من أحد أفضل وأشهر الوظائف، الحقيقة عالم البيانات أو الـ Data Scientist في النهاية مطلوب منه يعمل نفس اللي بيعمله ال Data Analyst مع بعض الإضافات وأهمها هي القدرة على بناء Statistical Models وساعات كتير بيبقى هدف النماذج دي هو توقع شيء من خلال اللي حصل في الماضي. أمثلة (مبيعاتنا هتبقى قد ايه الشهر الجاي؟ ايه أفضل تسعير لمنتجاتنا وحجم الطلب المتوقع مع كل سعرمقترح).
تعليقات
إرسال تعليق